Kann eg hava fingið eina sexsjúku?

Er tad nøkur fyribyrging i føroyum fyri dagin aftaná man hevur havt samlegu. Sum man kann faa a apotekinum?

Hey :) 

Ja, tú kann fáa ein angribolla (fortrydelsespilla). Angribollin skal takast skjótast gjørligt eftir samlegu, og innanfyri 72 ella 102 tímar (ann uppá hvat slag tað er).

Angribollin fæst í hondkeyp, so tað er ikki neyðugt við resept frá einum lækna. 

Um tað er í vikuskiftinum, so fær á apotekið tá lúkan er opin. Lúkan er opin í eitt avmarkað tíðspunkt hvørt kvøld. Ring til læknavaktina, og spyr tey nær lúkan er opin. Sunnudag er opið 14.30 til 15.00. 

Angribollin er upp til 85% tryggur, um hann verður tikin skjótt og rætt. 

Angribollin verjir ikki ímóti sexsjúkum, so tað er týdningarmikið at lata seg kanna hjá lækna.

Nýt hít saman við tíni fyribyrging til næstu menstruation, tí angribollin minkar virknaðin á fyribyrging við hormonum.

Alt tað besta

Vinaliga

Kyn-toymið 

Hey. Eg eri ein 15 ára gomul genta. Eg havi fingið mín fyrsta sjeik, og vit vilja gjarna í song saman. Ongar av mínum vinkonum hava prøva tað fyrr, so eg kann ikki spyrja tær. Eg eri bangin fyri at bløða, tá vit skulu gera tað, tí tað er flóvisligt. Er tað vanligt, at man bløðir illa fyrstu ferð?

Heilsan nervøsa gentan

Hey góða tú,

Tað er vanligt, at ein er nervøsur fyrstu ferð. Summar gentur kunnu bløða eitt sindur undir og eftir sex. Hetta er ófarligt.

Tá ein kvinna hevur sex fyrstu ferð, kann hon bløða frá jomfrúðhinnuni/kynskransinum. Hetta tí at kynskransurin, ið er ein slímhinna, sum situr nakrar cm innanfyri skeiðopningin, kann fáa rivur, tá penis fer inn og út. Tað eru als ikki allar kvinnur, ið bløða, tá tær hava sex fyrstu ferð.

Tað týdningarmiklasta er, at tit bæði hava hug og eru trygg við støðuna. Um tú fært kraftiga bløðing og pínu, so skalt tú seta teg í samband við tín kommunulækna.

Alt tað besta,

Heilsan Kyn-toymið.

Hey tit! Tá vit hava ítrott við flokkinum, og vit skulu í bað, so havi eg lagt merki til, at mín murtur ikki er líka stórur, sum hjá hinum. Eg eri nervøsur um, hann er ov lítil til at gentan fer at føla nakað. 

Heilsan eg

Hey tú!

Støddin á penis hevur sjáldan týdning fyri, hvussu gott sex er. Tá penis er slappur, kann støddin vera ymisk. Tá penis verður stívur, fyllist hann við blóð, og verður oftast longri og breiðari. Summir vaksa bert eitt sindur, meðan aðrir vaksa nógv. Fáir eru somu stødd slappir og stívir.

Tað eru fleiri mátar at hava sex, og tað er ymiskt, hvør máti er góður fyri hvønn einstakan. Við penetratiónssex kann skeiðin hjá kvinnuni (vagina) víðkast og trekkja seg saman. Hon broytist nógv í longd og breidd undir samlegu, tá kvinnan verður seksuelt tendrað. Tí er støddin á penis ikki avgerðandi. Eisini eru nógv onnur støð, ið er góð at stimulera samstundis, so sum klitoris, bróstvørtur, oyru, nakki, osfr.

Vónandi fekk tú svar uppá tín spurning.

Heilsan Kyn-toymið

Hey
Eg og sjeikurin høvdu sex og vit høvdu onga hít. Aftana 2 min angraðu vit tað og steðgaðu, ti vit føldu tad var kanska eitt sindur risky. Hann spermaði so ikki. Eg taki ppillar, so eg hugsi ikki so nogv um graviditet, men eg eri bangin fyri kynssjukum.

Hann hevur verið vid einari fyrr, og so vid mær. Hann var min fyrsti. Hann segdi hann ikki hevur nakra kynssjuku, men eg giti ikki hann hevur kannad seg. Min spurningur er um eg skal vera órolig, og fara at kanna meg?

Ella um eg skal bara lata vera vid at hugsa um tad.

Takk fyri tín spurning til brævkassan.

Ja, tað er møguleiki fyri, at tú kanst verða smittað við eini sexsjúku, hóast tit bert høvdu sex uttan hít í 2 minuttir og partnarin hjá tær ikki kom. Tín partnari kann ikki við vissu vita, at hann ikki er smittaður við eini sexsjúku, um hann ikki er vorðin kannaður. Nógvar sexsjúkur, har ímillum klamydia og gonorré, geva oftast slett ongi symptom.

Tí er tað eitt gott hugskot at tú verður kannað fyri sexsjúkur hjá tínum kommunulækna. Um tú ongi symptom hevur, so er ein kanning fyri klamydia og gonorré mest neyv umleið 3 vikur eftir samleguna. Fært tú áðrenn hetta symptom sum svíandi vatnláting, óvanligt útflot, bløðing ella pínu í undirlívið kanst tú seta teg í samband við kommunulæknan.

Tað verður viðmælt, at tú/tit brúka hít inntil tit kenna svar uppá royndirnar.

Og at enda: Tað er altíð okay at umbestemma seg - eisini hóast man byrjaði við at hava hug og samtykti til samleguna.

Alt tað besta 

Vinaliga 

Kyn-toymið 

Spurningur 

Hvat skal man gera um hítan skrædnar undir samleguni, og man ikki tímur at siga nakað við síni foreldur, tí familjan er ein sera kristin familja. Tey høvdu allarhelst verið super óð.

Svar 

Góða tú!

Um hítin skrædnar undir samlegu og kvinnan ikki tekur aðra fyribyrging, so er tað møguleiki fyri at gerast við barn. Í einum tílíkum føri kann vera neyðugt við neyðfyribyrging. Angribolli fæst á apotekinum í hondkeyp og skal takast skjótast gjørligt eftir samlegu. Les meira um tað her.

Harumframt er møguligt at blíva smittaður við sexsjúkum um tað kemur hol á hítuna. Í einum tílíkum føri viðmæla vit at báðir partar fara til læknan at kanna seg. Les meira um sexsjúkur her.

Í eini tílíkari støðu kann vera gott at tosa við ein vaksnan. Um ein ikki følir, at man kann tosa við foreldrini hjá sær, so ber til at venda sær til onkran annan vaksnan. Hetta kundi til dømis verið ein lærari ella ein familjulimur, sum tú hevur álit á. Harumframt er eisini møguligt at fara til sín kommunulækna uttan at siga foreldrunum frá tá ið tú ert yvir 15 ár. 

Alt tað besta! 

Heilsan Kyn toymið. 

Spurningur: 

Er tað normalt at skrædna hvørjaferð?

Svar:

Hey tú :-)

Tað er ikki vanligt at skrædna/fáa rivu hvørjaferð ein hevur samlegu. 

Tá ið kvinnur verða tendraðar víðkast skeiðin og verður fuktig, og hetta ger, at tað verður pláss fyri penis í skeiðini. 

Um tú skrædnar/fær rivur hvørjaferð tú hevur sex, eru tað nøkur ting, sum tú og partnarin kunna royna áðrenn samlegu fyri at fyribyrgja hesum. 

Tað er umráðandi at tú ert ordiliga vát/tendrað áðrenn penetratión. Um ikki, kann tað hava við sær, at tú fært eina rivu. Her kunna tit m.a. Royna at hava eitt longri forspæl og/ ella brúka glíðikrem. 

Eisini er tað sera umráðandi, at tú kennir teg trygga í støðuni. Um tú ikki ert trygg kanst tú koma til at spenna í kokubotninum, og tað kan eisini gera at man fær eina rivu. 

Tað er umráðandi at leggja afturat, at tað kunna vera ymiskar grundir til at man blívir við at fáa rivur í undirlívið, og hjá summum kemur tað av til dømis útsletti ella bruna. Tískil vilja vit viðmæla tær at fara til tín kommunulækna at fáa tað kannað nærri.

Vónandi fekk tú svar uppá tín spurning!

Heilsan Kyn toymið. 

Hey góða tú.

Takk fyri boðini. Tað er individuelt, hvussu vit føla eina orgasmu. Okkurt, ið er gott fyri teg riggar kanska ikki fyri ein annan.

Tú skrivar, at væta kemur út, tað kann vera tí tú ert vát og tendra, og tískil útloysir vætu/sekret. Hinvegin kann tað eisini vera, at tú hevur fingið eina sproytu-orgasmu. Tá kemur meiri væta út, og tann vætan er oftani tynnri enn vanliga vætan/sekretið, ið kemur, tá tú t.d. ert tendra og vát.

Tá man fær eina orgasmu, merkir man tað oftani í kynsgøgnunum, kroppinum og heilanum. Hjartarytman økist, andadrátturin verður skjótari og kynsvarrarnar vaksa av blóðnum, ið kemur til t.d. klitoris, ið ikki bert er á stødd við eina ertu, men faktisk eisini liggur framvið innaru kynsvarrunum, ið eisini vaksa. Tá tú so rakar klimaks, trekkja vøddarnir í skeiðini (vagina) seg saman og nógv dopamin verður sent til heilan, ið gevur tær eina kenslu av m.a. vælveru. (Dopamin er eitt hormon, ið regulerar hug/vælveru kenslurnar í heilanum).

Vit vilja viðmæla tær, at seta tíð av til at onanera. Lær tín krop at kenna, byrja róliga og nert við teg sjálvan. Føl við fingrunum, hvat følist deiligt og um hevur hug til tað, so kanst tú eisini brúka eina leiku.

Góða eydnu!

Vinarliga

Kyn-toymið.

Hey, eg eri ein 13 ára flótandi kyns drongur sum vil gjarna vita hvussi sperm smakkar? Eg havi ongan at spyrja.

Hey tú :) 

Sperm kann smakka bitturt og salt, men smakkurin kann eisini ávirkast av um persónurin td. roykir, og hvønn kost persónurin etur. 

Tað er týdningarmikið at undirstrika at mann ikki skal smakka ella svølgja sperm, um mann ikki hevur hug til tað. Hetta hevur ongan týdning fyri njótilsi av sex. 

Vinaliga

Kyn-toymið

Hey kyn, hví komu tit ikki til miðnámsskúlan í Vestmanna í viku 6? :( vit eru ein keddur 1. flokkur sum bíða spent!

Hey keddu tit 

Sum tað er deiligt at hoyra frá tykkum!

Fyri at vit skulu koma út til tykkum at undirvísa, so má skúlin og/ella lærarin hjá tykkum bjóða okkum. Um vit verða boðin, so koma vit fegin at undirvísa tykkum :) 

Heilsan 

Kyn-toymið 

Eg havi so ringt við at fáa hann harðan tá eg eri við damuni hjá mær, eg haldi okkurt er galið við mær og hettar hevur eina ordiliga negativa ávirkan á okkara parlag. 

Hey :) 

Hetta er ein rættiliga vanligur trupuleiki. Ofta handlar tað um at mann er nervøsur, og óttast fyri at ikki gera tað gott nokk. Mann kann føla seg pressaðan, og tá hendur tað ofta at penis ikki verður harður nokk. Tað sum hendur er at tað blívur ein ónd ringrás, mann óttast at penis ikki verður harður, og so verður hann ikki harður. Tað er vigtigt at taka tað róligt saman, og merkja at mann stólar uppá sín maka. Snakki saman, og avtali at fara róligani fram.

Um hetta ikki hendur tá tú onanerar, so er tað nokk tí at tú ert nervøsur og óttast at ikki gera tað gott nokk. Um tú eisini hevur trupuleikar við erektionini tá tú onanerar, og hetta hevur staðið uppá eina tíð, so kann mann fara at snakka við læknan. 

Men tað besta ráðið er at snakka við sín maka, arbeiða við at føla seg tryggan og royna at ikki pressa hvønnannan. 

Alt tað besta 

Kyn-toymið  

Er tað normalt at spina skjótt. Eg kann gott spina innanfyri nøkur fá sekund. Er tað nakað man kann gera við tað?

Hey :) 

Hvat er normalt í mun til at koma, er sindur ringt at siga. Faktisk føla 1 út av 3 monnum ofta at teir koma ov skjótt, so hetta er nakað sum nógvir menn uppliva. Og tað kann eisini henda av og á, tað kann henda tá ein er nervøsur, ov drukkin, ella bara spentur. Men um tað er soleiðis hvørja ferð, og tað gongur út yvir sexlívið hjá tær og tínum maka, so eru nøkur ting sum mann kann royna. 

Eitt ráð er at royna tað sum eitur Stop-Start metoduna. Hetta er tá mann onanerar fram til beint áðrenn mann er við at koma, og so steðgar mann. Hetta skal endurtakast 3-5 ferð. 

Eisini er týdningarmikið at snakka við sín maka, at føla seg tryggan saman, og ikki føla seg pressaðan. 

Alt tað besta 

Kyn-toymið